Maasboulevard 16-08-2012

Venlo zó'n stad zoeë besteit d'r maar ein mit zó'n schoeën stadhoès. En inmiddels ouk mit ein schoeëne Maasboulevard. Ik zoog lets ein foto op Facebook en die foto had de titel 'Port Venlo'. Ein waan foto die al genôg zei met dees titel. En op ein van de plekke op 'Port Venlo' zit ik noow. Ik zeen minse geneet van ein drenkske en wat te aete, maar ouk minse die ik zeen geneete van eur rös op 't graas aan de 'Pessantehave'. Dit is 't nieje Venlose laeve. Ein laeve det jongere en volwassene aansprik. Ein laeve det Venlo weer iets positiefs aan de Venlonaere guuëf. Det positieve wat vuuël Venlonaere in de aafgelaupe jaore kwiet zien gerak. Kwiet zien gerak doordet de ontevreejenheid van vuuël Venlonaere ein negatieve werking had op Venlonaere die nog 't ein en ander positiefs zooge in Venlo. Messchien waare det optimiste die eigelik neet dörfde te zegge det ze positief euver Venlo dachte. Meugse zegge det det soort minse, minse zien die bang zien um door dé groeëte groep veur gek verklaord te waere, ik dink van wal. Gelökkig is d'r dan nog ein kleine groep die wal dörf te zegge wao 't op steit. De groep minse die oètintelik eur geliek krieg. Neet umdet ze det wille maar umdet ze ouk ech geliek hebbe. Geliek hebbe umdet ze altièd de positieve kante van Venlo zien blieve zeen. Vuuël minse die noow geliek kriege hadde det 20 jaor geleeje ouk al. Toen 20 jaor geleeje de planne veur ein Maasboulevard bekint woorte gemak, waare d'r ouk vuuël positieve geluuje, det kwaam doordet idderein weer positieve kante van Venlo ging zeen. In die 20 jaor zien hiel vuuël Venlonaere dae positieve gedachte kwiet gerak. Kwiet gerak umdet 't allemaol te lang deurde. En noow in 2012 is die Maasboulevard de beste plaats um te geneete van alles wat Venlo te bringe haet. Hebbe die minse die in die 20 jaor 't geluif in Venlo en 't positieve in Venlo zien kwiet gerak geliek gekrege? NAE! En waorum neet, umdet zeej schauw waare veur iets wat veur eur onmeugelik leek naodet die Maasboulevard d'r nogsteeds neet waas nao 3, 4, 5 jaor. Die minse zien noow nao 20 jaor op eur plaats gezat. In de negatieve zin van 't woord bedoeld dan. Dök zien det dan ouk de minse die op ein te naodrökkelikke menier positief zien euver Venlo en de Maasboulevard. Allein maar um toch nog geliek te kriege van minse die 't positieve nog neet zooge. Daorum blief ik 't positieve in Venlo zeen. Um oètintelik van andere te huure: "Stan de hes verdomme geliek." Neet umdet ik det wil, maar umdet ik geliek heb.

Venlo is mier dan ein stad,
Stan